Эрзяне - Эрзят ...

«Од пингень тансть»✅💯📖 Аволь умок «Книга» издателень кудось нолдызе Марина Девятовань – «Эрзянь правда» газетань прявт редакторонть – «Од пингень тансть» васенце книганзо. Сон алтави творческой кинзэ 25 иетненень ды «Эрзянь правда» газетань 105 иетнень топодемантень. Книгась нолдазь Мордовия Республикань Цифровой развитиянь ды массовой коммуникациятнень министерстванть лезксэнзэ вельде, нолдыцясь – Н.Б. Голенков. Марина Девятова сермады вишка шкасто саезь, секскак пусмонтень совасть эйкакш пингень эрзянь кельсэ стихть, евтнемат ды евкст, нурькине евтнемат, журналистэнь блокнотсто сермадовкст ды рузонь кельсэ статьят. Кода касы-кемексты сонсь ломанесь, истя шкинемазояк виевгады ды домкалгады. Истят полавтомат редявить авторонть творчествасояк: эйкакш пингень васенце стихтне ды евкскетне шождат, парсте чарькодевикст. Сынь пертьпелькстэ, ракшадо, велень эрямодо, васень вечкемадо ды тиринь эрзянь кельде («Кизэ», «Тундонь моро», «Моро эрзянь кельде», «Од пингень тансть», «Салыця овтыне»). Седе тов евтнематнесэ ули арсема, мелявкс, эрямонть чарькодема («Ливтявлинь бу мекшекс…»). Журналистэнь кинть лангс чалгазь, Марина Николаевнань чачить статьят, конатнесэ панжови ломанесь. Сонзэ эрямозо, обуцязо. Те вадрясто невтеви истят сермадовкстнэсэ, кода: «Стака улемс алкуксонь ломанекс» (алтавсь А.Т. Куняевень чачома чистэнзэ саезь 90 иетнень топодемантень), «Пилезелень сырнень вайгель» (Вера Каяцкая морыцядонть), «Аверкин – Рязанень ине цера, покштянзо коряс – эрзятнень нуцька» (содавикс композитордонть А.П. Аверкиндэ) ды седе тов. Нама, эсь шкинемасонть авторось башка мель яви раськень койтнень-кирдатнень невтемантень – «Эрзянь свадьбась Московсоль», «Сабанцелесь – кезэрень веле», «TAVLA TRAIL» – фестиваль бега с национальным колоритом», «История любви осетинского парня и эрзянской девушки», «Как мордва для себя Якутию открыла, а якуты – мордву», ды семиянь питнейчитненень – «Василий ды Анастасия Сидоровтне: «Вечкемась – те вейке-вейкень мельванома», «Семейный бизнес Жочкиных: общее дело объединяет и вдохновляет на развитие», «Станислав Горин: «Любовь к родному краю – это не только слова, но и действия!». «Од пингень тансть» пусмось пурнынзе эсензэ юрс эрьва кодамо жанрань произведениятнень, секскак туи мельс ловныцянтень. Тиражозо – 300 экземплярт. Сон туи республикань ды томбалень библиотекатнес. Минек справканок: Марина Николаевна Девятова чачсь Отяжбуень Сабанцеле велесэ 1977 иень ноябрянь 19-це чистэ. 1994 иестэ прядызе Сабанцелень средней школанть, мейле тонавтнесь Н.П. Огарев лемсэ МГУ-нь филологиянь факультетсэ «Журналистика» специальностенть коряс, МР-нь Правительстванть юрсо гуманитарной наукань НИИ-сэ «Мордовская литература и фольклор» специальностенть коряс. 1999 иестэ саезь 2001 иес роботась внештатной корреспондентэкс ды корреспондентэкс «Мордовия» ВГТРК-со (нолдась «Калярдомкат» эрзянь кельсэ передача), 2001 иень августсто саезь важоди «Эрзянь правда» газетасо. Васня ульнесь культурань отделэнь корреспондентэкс, мейле экономикань ды велень хозяйствань отделэнь редакторокс, 2019 иестэ ладязель газетань прявт редакторокс. Марина Николаевнань сермадовксонзо лиснесть «Чилисема», «Сятко», «Журналистика и медиарынок» журналтнэсэ, «Голос мордовского университета», «Вперед», «Сударыня» ды, нама, «Эрзянь правда» газетатнесэ. Сонзэ сермадовксонзо изнясть Весероссиянь зярыя конкурстнэсэ: «Вся Россия – 2024», «Вся Россия – 2025», «Моя Земля – Россия», «Экономическое возрождение России» ды лият. Юлия Еремина

Низовкась тешкстызе чачома чинзэ Орданьбуень районсо ули кезэрень мазый эрзянь веле Низовка. Аволь умок сон тешкстынзе эсь 355 иетнень. Коень коряс, те кенярксчинть ютавтылизь Троицянь недлястонть – Игрищасто, зярдо ильтить тундонть ды вастыть кизэнть. Пиретне-паксятне видезь, эмежтне озавтозь, сась шка аламодо оймсемскак ды ледстямс стувтовозь койтнень-кирдатнень. Низовкасо «Тундонь ильтямо» коенть истя келейстэ, кода тедеде, эзизь тешкстакшно умок. Од ломантне кармасть уш стувтомонзо, секскак велень культурань важодицятне арсесть вельмевтемс сонзэ. Те чистэнть велев пурнавкшность ламо инжеть: сеть ломантне, конатне зярдо-бути тесэ эрясть ды тусть лия енов, ней жо сакшныть тиринь веленть ды родняст-раськест содавтомо. Тетяст-аваст, покштяст-бабаст кудос пурнавкшность ошсто эйкакштне ды од ломантне. Валске марто цератне ды эйкакштне ушодсть валномо эсь пряст ды вакска ютыцятнень лисьмапрянь ведьсэ, понгсть ардыця машинатнеяк. Зяро пейдемат ды эрьгелемат ульнесть, сехте пек сестэ, зярдо кой-кинь савкшнось кудосто ливтемс. Ансяк кияк эзь покордавкшно, эдь тосонь ломантне кемить – те чистэнть ведьсэ валномась максы кеме шумбрачи ды покш уцяска. Тейтерьаватне жо ды сырькайтне ожо ды пиже тюссо артсть алт. Троицясто ловови, бути веле песэ ниле енга ертнят алт ды вешат Пазонть кедьстэ лезкс, шумбрачи, парочи ды уцяска, паро норов ды ламо эйдеть, – весемесь топавтови. Кадык те коесь а пек сюлмавозь православной кенярксчинть марто, ялатеке сон Низовкасо ванстови ламо пингень перть, сонзэ вельде эрицятне кирдить сюлмотнень ютазь шканть ды неень шканть марто. Обед енов «Цековне» велень фольклорной ансамблянь аватне прявтост В.В. Тюгашкин марто моразь ды киштезь ютызь весе велень ульцятнень педе-пес. В.И. Новикова виев вайгельсэ морсесь Низовкадо эсензэ нурька морынензэ. Истя ушодовсь «Тундонь ильтямо» коесь. Эрицятне кудост икельга аравтнесть каванямка марто стольть ды вейсэ ансамблянь аватнень марто ледстнесть сеть ломантнеде, конатне макссть ламо вийть веленть кастомга ды кемекстамга. Библиотекаресь Ю.М. Явкина ледстизе «Цековне» ансамблянь ушодыцянть, МР-нь культурань заслуженной роботникенть В.И. Клементьевань, конась весе вийсэнзэ ванстсь велень историянть, покштятнень-бабатнень сюпав койтнень-кирдатнень. Ледстязельть велень активисттнэ, тонавтыцятне, механизатортнэ, прявттнэ, Ине Отечественной ды лия локальной войнатнесэ чавовозтне. Сюкпрянь валт евтазельть Низовкань храмонь настоятелентень Михаил батюшкантень, СВО-нь участниктненень. Велень кенярксчисэнть почетной инжекс кармасть сехте сыре ломантне, юбилеень тешкстыцятне. Сынст ды весе пурнавозтнень туртов мазый морот эрзянь ды рузонь кельтнесэ гармошкань пачк гайгстасть «Цековне» ансамблянь морыцятне. Чопоньбелес эзь лотксе гармониясь, седейстокиця сонзэ мелодиятне сралесть леенть чирева ды вармась кандсь сынст васов-васов… Марина Девятова