Халпусак ке хIа некьи э

🍉Дуьйин варттал фикир акьучин кьацIра хIисаб акьуна ккидиркIвадегьен гьер джурейин емишар алдея. Гьер инсандин аве учин йиркIурас ккане емиш. Ая емишар иттеттар - IуьчIеттар, хIаттар-бицIиттар, гьер джурейин рангунинттар, IуьтIуттар - даIуьтIуттар, агуттар - дагуттар, ягIаттар - дагIаттар. Амма хIаттилас бицIиттилди рукьуна халпусак дагIаф адава🍉. Ме дакканфра са Iудра авейдава.
Халпусак хьехъди рукьунаяф лап авал заманайилас мич э.
Ме емиш ишламиш аркьайи, Iелди паччагьари, фараонари. Хье вилаятиъ ппара шагьурариъ кегъучIа халпусакар.
Амма ке идже, ширин халпусакар вереф хIисаб аркьа Астраханьдиъ. Ме шагьурдиас файдеттар пегуна, джурейи гъуланде инсанари.
Ая мебур гьер джурейин тумунинттар. Чаб агубас мебур гирген емишар э. Амма агьал керхьуная сасра хIуькуматар мебур якьу мурттанинттар хIа аркьай.
Ге кар аркьаяф машинариъ икьуна варха хIуькуматариъди гъарегуна ппара арукьас. Ая мебур хъуьхъе гIанар аяттар, кьацIра ирккар адаваттар.
Халпусак уч агубас фишттинф ичинра, вахттуни узуна, ругуъ хIа хьеттик кея ацIуна гьер джурейин витаминар: А, С, В6, Е, К, фолиевая кислота, фосфор, магний, железо, кальций, магний, медь, цинк, марганец, тиамин хъара ацIуна джуреттара.
Халпусак ишламиш аркьа инсанди джирехIвелдиъра. Халпусакдин гIан IуьтIуна къаркарикес аркьа варенибур.
Авал заманайи хье кар э агъа ме.
Дадахъ хъуйи са кIиркI.
Са ягъарикес са ягъа иттархьуная мин хъая са кIиркI. Дард йирхIуная дадан йиркIурас. Сагъилдира сагъ акьас вейхьуна адава мивас учин кIиркI. Дафайшу духттур, шагьур андавуйи агъа ме дада учин кIиркI, дакьу руб-дарман андавуйи агъа, амма сайивасра ягIар акьас вейдавуйи фи ичин мин кIиркIас акьунаяф. КIиркIан гьава ягъалас ягъа начагъ вей хьуная. Архьуная ахуниъ. Ппара гагь хьуна адава кIиркIан ахуниъ ай, кIиная ме. Ме кIехаба дада пуная духттурарис гьал дехIера ягIар акье фиттилас иттархьеф ичина учин кIиркI.
Са вахттунилас адиная дадалди духттурар са тIуб дегьен ирккра фай. Магьме иркк ве кIиркIан йиркIуралас алттивуфе чин, пуная мебури. Магьа ве кIиркIан иттал пуна, йиная мебури ме иркк дадалди. Вахттара кеттушуна кIиркI кIехаба. Ме дада учис фикирдис ме ирккуракес акьуная кантIун кучI.
Са ягъарикес гъушуная ми учис халпусак. Аттивуна учин ягъди фая кантI башламиш акьуная адарцас. Халпусакдин хьед киркьуфнасад кантIалан кучI ицIуна ушуная. МуьхIтал хьуная ме фи ичин хьеф, гъавурдиъ адархьай, гъилив фамилгуная мин Iари, кIучI хъундавай кантI. Хаб гъавди архьуная дад, экьуна Iешуная ме. Гьемидегьен рубар-дарманар акьунехи вас, зе кIиркI, пуная ми, ве дарман халпусак эхи.
Гьемишттингуна э агъаф, инсанди IуьтIуна кканде гьер вахттунин емишикес. Хьес хье джандик кеяф аргваф далара даргваф ппара э. Фиттикес дарман хьасичин ягъайдава.
🟠Луиза Гусукаева